MARKUS
16: 1-8
MONANG
JALA HEHE MARALOHON HAMATEAN
- patujolo
Nunga
mungkap dalan tu hangoluan jala monang ma hita jumpa ajalta. Ala naung
ditaluhon jesus hamatean i. na hehe do ibana, mulak mangolu di ari patoluhon
songon na nidokNa tu angka siseanna (markus 8:31).
- Hatorangan Turpuk
Ro
do angka boruboru mansai sogot di ari parjolo dung sabbat, ima si maria
magdalea, maria ni si jakobus rap dohot si salome tu tanoman ni Jesus. Sangkap
nasida dimulana laho mamiahi bangke ni Jesus, hape gabe saksi haheheon do anggo
nasida, jala ingkon laho do nasida mamaritahon naung hehe Jesus sian na mate.
Nang pe songon hasomalan do adat jahudi mamiahi manang mangapuri bangke ni
naung mate, adat on ndada na laho marsomba manang laho pasangapsangaphon naung
matei nasida umbahen dipatupa songoni, alai na patuduhon na so tarsirang hamatean
i do anggo holong ni roha i.
Andorang hamamate ni Jesus I didok do na
hehe do Ibana di ari patoluhon, alai sada pe sian angka sisean I dang adong na
marsangkap laho membuktihon I, lalap do nasida dihalaputi biar ni roha jala
habot ni roha. Alani ma ro surusuruan mandok tu nasida “unang hamu mabiar,
nunga hehe ibana, ndang dison Ibana.” Kristus monang maralohon hamatean, dosa
nang sibolis. Dipagalakgalak hamateani do tutu biar ni roha ni hita jolma
tarringot tu hamateani. Ido umbahen jumolo dipaposhon rohanasida asa unang
mabiar. ima mandok ingkon sumuang denggan roha nasida, dao siang hagangguon,
asa boi tiur laho manangkas na tutu situtu do naung hehe Jesus. Tangkasi
hamuma, parrohahon hamu ma, ido na nidok ni surusuruan umbahen didok hatana:
ida hamu ma inganan hapeahanNa on, Bukti na hehe Jesus, ima “kuburan kosong”.
- Panimpuli
Hata
ni surusuruan ni Debata mandok : UNANG HAMU MABIAR. Ima barita haheheon ni
Tuhanta Jesus tu sude halak na porsea di Ibana. Nunga hehe Tuhan I, jumolo do
Ibana tu inganna hasonangan I paradehon ingananta disi. Malangke pe sibuk on,
harhar holiholi on, unang be mabiar, ala dang hatiopan hamatean I hita, songon
Tuhan Jesus hinaholongantai. Unang mabiar hamu, ndang dison ibana, batu
sigulangon sian roha batu di rohantai nunga digulang Tuhantai. Alai sai jotjot
dope hita na mangguling batui gabe tartanom muse hita di pangalaho hamateani,
ima dosa. Alani tahangoluhon ma di rohanta barita haheheon I, asa unang be sai
dompak pangalaho hamatean i be hita mangolu.
0 Response to "MARKUS 16: 1-8 MONANG JALA HEHE MARALOHON HAMATEAN"
Posting Komentar