HEBER 4: 12-16
A. Patujolo
Surat Heber digurithon panurat na so tinanda alai
dihaporseai na diajari tondi I do ibana lao manurathon asa tarbarita huaso ni
Kristus tu angka na porsea. Panurat manurathon baritaon di luar ni kota Roma, ima sian
Italia jala rap do ibana dohot angka na porsea na di perantauan (Heber 13:24). Digurithon
do surat on tu
halak Heber na adong di Roma (Kristen Jahudi) na manaon sitaonon siala
haporseaon nasida tu Kristus. Jala nunga godang sian nasida na mandele siala
sitaonon I jala naeng mago haporseaonna, jala laos ido umbahen ditongos panurat
on asa lam margogo nasida, jala lam hot haporseaonna tu Kristus I, ima Sintua
malim na naung manorusi angka banua ginjangi.
B.
Hatorangan Turpuk
Di Ayat 12
dipatorang na adong 3 karakter ni hata ni Debata: mangolu (Hidup), marpangkorhon
(kuat), tajom (tajam). Hata ni Debata ima na mangalehon ngolu pardagingon nang
partondion tu angka na porsea jala na marhaposan tu ibana, jala mangalehon gogo
nang pe dibagasan pangunjunan manang sitaonon ibana di tingki ngoluna. Jala
gabe podang doi di angka jolma na bersandiwara
taringot tu haporseaonna manang hakristenonna. Ido umbahen na disurathon di
ayat 13, dang adong na onding sian jolona, jala tedek do sude, so adong na
huphup sian mataNa. Disurahon mai gabe poda tu halak Kristen na di Roma na sai
jotjot mabiar siala na masai, ima na dilele pamarenta nasida ala haporseaonna
tu Kristus i. dipangido panurat asa marposni roha nasida tu Hata ni Debata,
jala adong ketegasan na gabe siihuthon Ibana. Unang ma nian alani na mabiar tu angka panggomgomi gabe muba
haporseaonna tu Debata jala dao parangena sian siihuthon Kristus. Jala on do
nian sipangiot tu hita halak Kristen na mangolu di zaman sonarion na jotjot
mengalami angka kekerasan sian pamarenta nang suangsongoni na mengalami elaela
sian sibolis I siala hamajuan ni teknologi on, asa nargogo manaon sude na
masai. Nunga godang halak Kristen na
malo bersandiwara di hakristenon nai, idaon do badia, ringgas marminggu alai
pangalahona lobi do sian angka parjahat, on ma na didok panurat on, asa mabiar
ma hita tu Debata, ai so adong na onding sian jolona nasa na tinompana, jala tu
ibana do hita mardabudabu (memberikan pertanggungjawaban).
Di ayat 14-16 digombarhon
do Jesus songon sintua ni malim na bolon (imam Besar) na mangantusi manang
manghilala sude angka hagaleonta. Molo di Israel sintua ni malim ima halak na
dihabiari, mamora, jala dang diboto songon dia angka partinaonan na pogos. Alai
Kristus sintua ni malim na bolon i naung manghilala angka ondeng, jala na so
mardosa Ibana di tingki sitaonon nai. Laos ima nian na gabe ojahan manang
sitiruon ni alak Kristen, na boi do ditaluhon sude angka sitaonon i. ido
umbahen didk panurat on, marhiras ni roha ma hita mandapothon habangsa
parasiasian, asa tajalo talup ni roha, jala asa dapot asi ni roha hita bahen
pangurupion di tingki halehetanna. Songon pandohan halakna bisuk: duhutduhut na
malos I, ingkon hehe do muse di tingki halehetanna. Na marlapatan adong do
tingki na sonang di hita dilehon Debata, asalma gomos hita marurat, maniop Hata
ni Tuhan i.
C.
Sipahusorhusoron
Marhite turpuk on, dipatolhas do taringot tu
karakter ni hata ni Debata na mian di angka na tinompana, jala ido na mandongani
di parngoluanta asa naeng ma nian marsihohot hita di Hata nai, nang pe hita
dibagasan pangunjunan songon na tinaon ni halak Kristen di Roma. Kristus naung
manaluhon sude nasa hagaleon (kelemahan) ni portibion. Ala nii naeng ma hita tongtong marhaposan tu
Kristus na gabe sintua ni malim na bolon I, na naung manorusi banua ginjangi,
asa marhite i sude hita boi bongot tu harajaon ni Debata.
0 Response to "HEBER 4: 12-16 Lului Ma Tuhan Asa Mangolu Ho"
Posting Komentar